Betemu enggau Kaban ...

Kemari aku enggau ngulu makai kahwin, lalu maya nya bisi betemu enggau kaban/ kelala lama. Kaban ke terubah enggau aku betemu ianya Dr. Jawa & bini iya. Bini iya betemu lalu nanya ke berita apai & indai, tertanya-tanya ngah ati aku; dini meh aku ngelala seduai iya. Bisi ngah di padah ke mimit sapa seduai olih kaban siko ke duduk sepiak aku. Nuh ka ambis lemai baru iya madah ke diri selalu diau aba niang aya Charles Saong (tepak ayak ari Ranan, Kanowit) maya taun 1973 di Kuching. Retinya suku juru meh iya tu, kini - nganti betusut ila!

Gaga ngah ati ulih betemu enggau seduai melaki bini, taja aku enda ingat. Maya nya agi biak endal aku, nadai tentu berati ke kaban belayan. Semina ke ingat maya di Kuching kelia selalu nemuai ngagai kaban suku juru ianya niang uncle Charles Saong & niang uncle Boniface Jarraw. Tang diatu nuh enda ngah semak enggau bala anak-anak sida. Sinu endal maya berati ke nya. Nya meh pengurang bala ke biak, nyebut aku empu; enda berundang enggau diri sekaban/suku juru. Enti orang kelia, nemuai ngagai pagan diri belama orang. Kitai diatu, utai ke kena begiga enggau pagan diri nuh mayoh nuh canggih agi; tang peranggai kitai enda begiga tauka berandau enggau pagan diri. Tu siti pemansang dunya ke aba aku endang tentu dikerindu, tang meh enda ngah diri ka ngubah! Nya alai salah diri empu meh nya!

Dr Jawa & bini iya

(arap ke betul meh sepel nama iya, enti salah minta ampun)

Alam pemayoh bala ke datai enggau ngintu makai kahwin nya, gaga amat ngah ati betemu enggau kaban Sarakup lama, ianya Pn. Rita Insol ari Bintulu enggau sida sebilik. Sayau endal meh iya enda aktif endal alam Sarakup Indu Dayak Sarawak. Enda sempat beranda lama engga iya laban aku ke baru ka pansut pulai. Tahniah ke anak deh ke deka kahwin enda lama dah.

Pn. Rita enggau aku.