Pemansang kitai Indu Iban ...

Mayoh pengawa ke dikerja bulan Mac tu kemari, lalu semua berkaul enggau kitai indu Dayak/Iban. Pemansang kitai endang patut diperati ka lalu di atur manah agi ngambi kitai ulih berdiri sama tinggi. Pelajar & pangkat nya semina dua iti ari pemansang ke dipupuk kitai. Pemansang alam pengawa dagang, pemansang ngenuai ke diri serta mayoh agi pekara mega sekeda pekara ke deka dipupuk kitai. Kena pun bulan Mac tu kemari, aku enggau Uchi & Sinah bisi dikagau betemu enggau Perdana Menteri Malaysia alam siti progrim 1Karisma di Stadium Bukit Jalil, Kuala Lumpur. Rindu ngah enggau - taja aku endang enda rindu enggau orang besekut, bebaris ... lama! Terima kasih ngagai Biro Wanita Sarawak ke udah bisi SIDS, Sibu peluang ngari ke kitai indu Iban ke pengawa tu.



Maya nya kemari, kami tiga ianya siti gerup bala indu eknik Sarawak alam progrim nya. Bala sida indu Bidayuh (DBNA), indu Kayan & Orang Ulu mega bisi enggau. Tang ke sayau amat, pengari ari indu eknik ke diasoh sida bejako ngari ke kami ianya ari gerempong Women for Women, Margaret Bedus; lalu taja iya kaban SIDS serta indu Iban; buah jako iya ngari ke gerempong iya lalu enda nyengkaum bala bukai. Ringat amat bala sida ke bukai ninga buah jako iya!

Maya nya mega bisi betemu enggau YB Deputy Speaker Dewan/Senator Doris Brodie, siko indu kitai Iban ke udah mujur bendar alam pengawa iya.

Begambar begulai enggau YB Senator Doris Brodie enggau tuai-tuai indu eknik Sarawak.


Begambar enggau semua bala kaban indu Sarawak.

Kena pun Mac tu kemari, SIDS Sibu mega bisi ngatur siti seminar serimbai enggau Aum Taun; lalu temuai kami maya nya iany Profesor Madya Dr. Madeline Berma siko ari indu kitai Iban ke landik bendar. Iya profesor di Universiti Kebangsaan Malaysia serta mega megai pengawa pemansang orang indu di universiti nya. Terima kasih ngagai iya ke ulih limpang bejako setengah hari tentang pemansang indu Iban.

Begambar begulai enggau Prof. Madya Dr. Madeline Berma


Tuai-Tuai SIDS Sibu 2012-2013

Lemai nya, SIDS Sibu mega ngatur bepilih ke tuai-tuai. Terima kasih ke pengarap ke udah diberi kita ke aku agi megai serta nambah ke pengawa pemansang kitai indu Iban kelebih agi di Sibu. Tuju pengawa ke taun tu mega ianya:-
1. Ngerembai ke Sarakup ke bala indu Iban di menoa pesisir,
2. Ngemansang ke bala Indu alam pengawa dagang, pelajar, & ngenuai (leadership),
3. Ngenan ke main asal - taun tu, kajat, kerja jari (pua kumbu & tangu), serta
4. Ngansak bala indu Iban ke biak/bepelajar enggau masuk Sarakup.


Ujung bulan Mac tu kemari, sekula Methodist Secondary/Primary bisi ngatur gempuru besai ngingat ke sekula dua iti tu udah 110 taun. Maya nya, gaga ati ketegal sempat betemu enggau bala kaban ke lama! Asai ke baru kemari ke tetundi berandau duduk aba parit mit sekula; diatu nuh udah berumur serta uban pun mayoh sekeda! Ke taun tu semina ulih betemu enggau lebih kurang 10 orang aja. Arap ke taun ke dudi ila, ulih betemu mayoh agi!

Tu iya gambar kami sebuat!! Peda sida ke indu ke mayoh agi ka betemu. Nie sida ke laki?!

Lubuk Lebak! Lubuk Lebak! Tu kedua kali aku ngagai menoa atas bukit tu di Sarikei. Manah amat menoa, lalu enti dimaju ke ulih baka English countryside diatas bukit! Bala Indu Methodist ditu mayoh tang semina 18 orang aja ke enggau nyadi kaban. Puji Tuhan kali kedua aku kitu; mayoh agi bala datai ninga ke ajar/aum Pelajar Sehari. Penyaum & Pengarap kitai mesti bisi enti kitai ka ngerja pengawa. Lalu aku meda, bala indu ditu kelalu dikokong siko indu kitai; nyangka enggai belaya meh nya - munyi ko siko ari indu ke dia!

Tu sekeda bala indu ke bisi enggau ngulu pengawa sehari nya.