Penemu senentang Pekit Kumang ...

Pemenang-pemenang Pekit Kumang Gawai Dayak Sibu 2009 ...

Kiri-Kanan: Imelda John, Terrasse Inez Mawas, Priscilla Justin

Setiap taun maya pengerami Gawai Dayak endang bisi diatur pekit Kumang & Keling Gawai aba peringkat Bahagain, lalu kadang-kadang peringkat Negeri. Bala di rumahpanjai pen bisi ngatur bepekit ke baka tu maya sida ngatur pengerami sebedau Gawai.

Nama tuju kitai ngatur pemekit? Tuju ke amat sigi ngiga indu Dayak ke bajik gamal. Kati pemajik aja cukup? Cerita-cerita Kumang ari Panggau Libau endang selalu nusi indu ke benama Kumang tu ianya siko indu ke pengambis bajik, pintar & bepenemu. Pengelandik iya alam mayoh macam pengawa kerja jari. Nama kebuah orang ka enggau bepekit?

Maya aku belaboh enggau bala ngatur pekit tu, cara iya mega mudah aja - ngiga indu ke bajik; tang pengudah belasan taun tu, mayoh pengubah udah dibantai. Pekit Kumang ke diatur ianya Pekit Kumang Gawai Sibu, Pekit Kumang BCF, serta Pekit Kumang Gawai Dayak Sarawak. Atur-atur iya lebih kurang sama. Alam bulan Mei mega bisi siti pemekit pemajik ke diatur ianya Miss Fair & Love diatur enggau cara komersial.

1. Sapa ke ulih enggau bepekit

a. Bangsa:

Semua bangsa Dayak ulih enggau bepekit. Aku berati semina di Miri & peringkat Negeri bisi ngator alam 3 iti kategori ketegal mayoh agi tubuh. Di Sibu ditu, endang diatur alam pakaian Iban tang semua bangsa Dayak ulih enggau. Bangsa kitai ditetap ke nitih ke bangsa apai - nya siti ari pemutus Komiti mega. Contoh, indai Cina (tauka ke bangsa bukai) & apai Iban/Dayak agi dikumbai kitai Iban/Dayak; indai Iban/Dayak & apai Cina (tauka ke bangsa bukai), anak bangsa Cina/bukai. Taja bisi penemu ke madah tu bangsa Cina Iban or CiBan or nama2 kombinasi; ketegal kombinasi tu empai dikelala opis perintah, dilengka ke dulu. Enda ngah aku nemu, nyangka bisi ngah urang Dayak/Iban ke benama Tipong Siew Ling Meta (contoh) - nama kombinasi Iban & Cina? Aku enda ka meri komen pasal tu kediatu! Laban maya ke diatu, mayoh amat kahwin campur antara bangsa antara diri sama Dayak enggau ke ukai Dayak. Amat-amat 1Malaysia, 1Sarawak, 1Dayak!!

Pemekit Kumang BCF 2007 - ulih ngena ngepan bangsa diri empu.

Ketemu aku, atur Ms Fair & Lovely tu asal kitai warga negeri ulih enggau bepekit; lalu pakaian ke dikena pen bemacam-macam.

b. Umur & status kahwin

Endang bisi diletak atur umur, ianya enda kurang ari 18 taun lalu enda lebih ari 30 taun (enti betul ingatan aku), indu Dayak ke dara ianya empai berkahwin.

Selalunya Komiti bepangai aba 'honesty' pemekit tauka bantah bertulis orang bukai aba senentang tu. Umur tu senang kitai ngabas, ari kad tinke' sida; tang status dara - apu pedis tu, laban kitai nadai kala ngeluar ke surat/sijil kitai tu dara! Leka jako 'dara' pen mayoh reti - tang iya ke diambi iany nadai laki sah. Pengelama aku udah enggau ngatur pemekit tu, bisi ngah datai aba aku (enggau cara jako) orang mantah pemekit ketegal udah bisi anak tauka laki. Enti komplain nya madah sida udah belaki; aku selalu ngasoh sida mai rekod surat kahwin indu nya ke bukti tauka mai tuai2 ke ngelala indu nya. Tang enti nadai surat kahwin, kira ke dara meh nya; nginjau leka jako siko kaban blogger - nyangka nya orang ke 'advance'.
Atur nadai nyekat aba tu, lalu nadai mega nyebut dara bungas. Bisi mega mantah madah ke indu pemekit nya dara tang beranak siko - atur mega nadai nyekat pasal anak. Atur semina nyebut - dara. Laban ke dunya diatu udah jauh berubah; bisi mayoh orang dara beranak - dunya 'advance'.

Ari segi atur, nitih meh sida ke enggau. Munyi ko sekeda meh nya, ila ngatur Kumang ungkup sida ke 'mature' - ulih lah enggau ila!!

2. Cara pemilih

a. Pengelandik

Pemekit Kumang Gawai Sibu aja diuji pengelandik alam jako tanya, ngajat, enggau belagu. Pekit Kumang BCF nadai tu; Ms Fair & Lovely - enda nemu bisi ke nadai? Kategori tu diatur ketegal deka milih Kumang ke bisi kualiti ari segi penemu enggau pengelandik sida. Alam awal taun 90an suba, bisi mega ngatur sida Pemekit tu mansut ke diri lalu nyebut data diri mimit enggau tanya saut. Atur tu enda tentu mujur ketegal bala pemekit, empai ulih nitih ke atur; laban tuju kitai ke ngasoh sida nyebut data & tanya saut, ianya mantai ke kualiti suara & peningi penemu sida alam adat resam; tang utai ke sebalik iya nyadi. Enti enda salah ingat aku, 2 taun berturut cara tu diatur; udah nya diubah; enggai ke sida malu. Aku berasai malu laban kitai ka mantai indu Dayak ke 'pandai', bekualiti, bajik, serta bisi pengelandik.

Tu udah lebih kurang 15 taun aku enggau ngatur - kemayoh agi semina ke deka enggau ianya bala indu kitai lepasan pom 5. Tang bisi ke sekali sekala bala indu kitai Dayak ke bisi diploma/saujana muda - tang enda mayoh. Arap ke mayoh agi bala indu Dayak kitai ka lepasan sekula tinggi agi enggau bepekit.

Peratusan mata aba senentang tu ianya 15% - 20%.

Pemekit Kumang & Keling Gawai Dayak Sibu 2009 - maya pekit pengelandik seminggu sebedau malam Gawai.

b. Pemajik

Pemajik tu enda sigi digiga aba semua indu maya bepekit. Tang pemajik aba mata siko siko enda sama; nya alai kadang-kadang dikumbai orang akim enda betul, akim tu becheping, serta mayoh agi jako anu urang! Kadang-kadang bala Komiti pun dianu apai/indai pemekit. Jako pesan aku - adat bepekit betanding endang bisi alah enggau menang; enti enda ulih nerima pemutus orang bukai nge-akim kitai; anang enggau! Aku ingat lebih kurang 10 taun suba, siko ari bala Komiti aku ditikau ke orang enggau duit saguhati, laban iya enggai nerima nya. Kebuah iya, laban anak iya patut nyadi Kumang ko iya (anak iya tu, finalist pen enda) lalu iya berasai malu, ko iya.

Bakani akim merati tauka ka meri markah pemajik? Selalu nya, utai ke dipeda ianya: pemurak, gamal, gaya gamal udah di antah, kesemua gamal iya - tang munyi ko aku tadi - mata siko siko enda sama. Pemanis gamal indu dipeda, senyum ka enda, etc.. Kadang-kadang stail buk pen diperati ke bala akim.

Peratusan markah diantara 30%-40%.

Gambar-gambar dibaroh ianya dua iko pemekit Kumang Gawai Sibu 2009, ke terubah Cik Ilias, siko ari finalist serta ke kedua Cik Mawas, Kumang Gawai Sibu 2009. Dikena kita merati ke ngepan enggau pemajik seduai.

c. Ngepan

Ngepan enda dipeda ari ke asal tauka ke palsu (iya ke asal perak enda tentu berkilat), ngepan ke ngenap ari sugu tinggi, tangu, rawai, lampit, tali ai, tating kain, selampai, kain, buah angkung, gelang jari & kaki, lalu ke bukai ke lebih. Tang enda semesti nya enti semua utai ke bisi dilekat, laban enti iya kelalu mayoh/lebat, nuh salah ngah iya. Akim endang udah mereksa utai tu sebedau belaboh sida bepekit aba panggau. Nya alai, sida pemekit selalu diasoh siap sedia aba jam ke diberi; laban nya meh maya akim ke dipadu ke meri markah belaboh ngabas ngepan. Bisi ngah kala kami tetemu ke pemekit ke empai datai nitih ke jam - nadai discipline - lalu rugi markah.

Peratusan Markah antara 40%-60%.

d. Pejalai

Tu enda sigi di perati ari segi gaya, stail, etc sida bejalai ngelinggi panggau.

Peratusan markah antara 10%-15%.

3. Hakim

Siti ari atur ke digaga ianya - PEMUTUS AKIM ENDA ULIH DIBANTAH!

Munyi ko aku ari tadi, pemajik belain aba mata siko siko (beauty is in the eye of the beholder), nya alai bala ke udah diberi tanggungjawab nyadi Akim enda tau disalah dan dibantah, taja kitai enda besetuju enggau sida.

Sapa ke dipilih nyadi Akim?
Dulu suba enda bisi ngah aku ninga cerita munyi ke disebut bala kaban blogger pasal pemutus ke ngerakal tauka ngasoh kaban belayan si 'pemesai' menang. Nya nyangka ulih nyadi enti Akim siko aja; tang keselalu akim bisi 3 iko (kadang-kadang lebih) enda patut sepakat magang? Taja pia, cara ngambi milih Akim (enggau naka ulih) ke nadai kaban belayan enggau bepekit, sida ke 'temuai' di menoa tauka sida ke (dijangka) nadai kaban enggau bepekit. Selalu kami mesan bala Akim matak diri enti bisi kaban enggau. Bala Akim pen enda nemu diri dipilih, sampai ke lemai/malam nyadi; tu ngambi nadai orang ngelobi tauka bekempen sebedau nya.
Alam penemu aku, ke diatu, adil - tang tu penemu aku aja.

Selalu bala ke meda pekit kumang enda ingat tauka ke enda berati ke bisi siti pekit pengelandik ke di adu ke sebedau malamnya; lalu markah 15% tu mayoh lalu meri pemekit kumang nya menang tauka alah aba malamnya - taja pemajik, pejalai & ngepan sida nadai endor mantah - ketegal alah alam peratusan markah pengelandik!

Indu kitai Dayak - endang bisi pemajik (alah Jessica Alba ngena ngepan laban sekeda ari Kumang-Kumang Gawai), pemandai serta pengelandik ke ulih diansah.

Nyaut jako tanya aku ari mula tadi:-
1. Nama tuju kitai ngatur pekit?
2. Nama kebuah orang ka enggau bepekit?

Jako tanya ke terubah, ianya kitai ngatur pekit ketegal deka ngiga indu Dayak ke bajik, landik, serta bepenemu ngari ke kitai. Imej indu Dayak! Tang kitai endang sigi ngandal ke mayoh agi bala indu Dayak graduan ulih enggau laban nya mega deka mantai ke ukai semina pemajik tang mega 'kualiti' naka ke ulih. Pemajik aba gamal aja enda chukup; pemajik mesti ari gamal sampai ke dalam (segi pemandai (intelligence), manah ati, manah ulah, etc etc ) - internal & external beauty! Nya meh Kumang Dayak ke deka digiga! Nyangka enti prais pemenang manah agi, prais ke be'kualiti', prais ke merangsang; nyengkaum duit belajar serta nyadi 'duta' alam progrim komuniti Dayak - mayoh agi indu Dayak ka enggau. Kumang Dayak ke ulih nyadi contoh? Tu visi aku/komiti aba pekit tu!

Tanya ke dua, enti munyi ko saut sulu ati aku (anak) - laban iya ka ngulih ke 'crown'! :D Ketawa aku ninga iya; nya ko aku nyaut iya - Mami meli ke deh siti crown ari kedai, lalu ditimbal iya - "its not the same, mama!" Tuju bala indu tu mayoh, asai aku - keda engka nya baka sulu aku ka ke crown/duit prais, keda ka ke 'nama', keda nyangka nya ngambi dikelala orang mayoh agi. Bisi ngah aku macha ari bala kaban blogger - enda semesti nya 'laku' udah menang! Amat nya; tang bisi ngah cerita-cerita ke sukses! [Anang aja nyadi Sleeping Dictionary/Jessica Alba alam wayang nya, tang maybe nyadi Walking Dictionary (kitai meri reti ke lekanya). Walking Dictionary - person of intelligence.]

Cerita amat -

• siko ari Kumang Gawai Sibu udah nyadi Datin diatu;
• siko/dua bisi pengidup ke meruan,
• lalu siko Kumang ke dipebasa ke aku amat, ke mega dikelala - Puan Senorita Linang - pemajik ari semua segi sampai ke diatu!!
• sekeda bisi ngah graduan diatu lalu mujur dalam kerjaya sida.

Nama-nama pengandal di alam ati, kitai endang patut berusaha ngulih ke iya.